Anbhigya

Kabhi us nanhe balak ko dekha hai,
jo shayad maa se bichad gaya hai,
beech sadak pe baitha hai jo,
nirantar bas maa ko pukarta hai jo,

yun to koi takleef nahi hai use,
par koi apna kho gaya hai,
usi ko khojne nikal pade hain aansu jaise,
reh gyi hain anbhigya si aankhe peeche…

kisi aur ki parvah nahi hai use,
kahan hai vo,
kinke beech,
kuch nahi…
bas ek anjane bhay me lipt,
bheed me maa ko talashta hai vo…

agle hi pal,
vo tha maa ke aanchal me,
chashm-e-tar me bhi chalki thi vo,
muskaan jo laut aayi thi adharon pe ab…

maa ke aanchal ki chhaon,
har insaan ko mayassar nahi hoti…
hakimon ke pass bhi,
iss sargirani ki dawa nahi hoti…

par majal-e-khwab to dekho,
usi ek shann,
jaane kyu laga,
ki jaaun usi sadak par,
usi nanhe balak ki tarah…
jane kis guman me sochti hun,
ki bekhabar si ye deed-e-deedar,
kya pata, aaj khoj lein kisi apne ko… 🙂

– Priya Soni

Advertisements